Alliance Fleuve Congo yashyizeho ubuyobozi bushya bwa AREFA mu gihe ibibazo by’ubukungu n’umutekano bikomeje gufata indi ntera mu Burasirazuba bwa RDC

Mu gihe ubuyobozi bwa Leta ya Repubulika Iharanira Demokarasi ya Congo (RDC) bukomeje gushinjwa kubura ubushobozi bwo gucunga neza umutungo w’igihugu n’imiyoborere inoze mu Burasirazuba bw’Igihugu, Alliance Fleuve Congo (AFC) umuryango wa politiki ugizwe n’amatsinda arimo M23 na MRDP/Twirwaneho wasohoye itangazo rifite agaciro kanini ryerekana icyerekezo gishya cyo gucunga ubukungu, imari n’ubwishingizi mu duce twose bamaze gufata.

Mu itangazo ryashyizweho umukono na Bertrand Bisimwa, Perezida wa M23 akaba na Visi-Coordonnateur wa AFC, hamwe na Corneille Nangaa Yobelu, umuyobozi mukuru wa AFC, batangaje ko bashyizeho ubuyobozi bushya bw’Autorité de Régulation du Secteur Économique, Financier et des Assurances (AREFA), urwego rushya rugamije gushyiraho umurongo uhamye w’imiyoborere y’ubukungu mu turere twose tumaze kugera mu maboko ya AFC/M23-TWIRANEHO

Abayobozi bashya bashyizweho muri AREFA:

• FIEMA PUNDUYANGE Cédrick: yagizwe Umuyobozi Mukuru wa AREFA, akaba ashinzwe kuyobora uru rwego mu bikorwa byarwo byose bijyanye no gucunga umutungo no gushyiraho amategeko arengera abaturage mu rwego rw’ubukungu n’imari.
• MUSAFIRI BIGIRI Justin: yagizwe Umuyobozi Mukuru Wungirije ushinzwe imari n’ubutegetsi (Administration et Finances).
• KITUMAINI MUNANA Anselme: yagizwe Umuyobozi Mukuru Wungirije ushinzwe imikorere n’igenamigambi (Opérations et Risques).

Iri tangazo risohotse nyuma y’inama y’abagize AFC yabereye i Bunagana ku wa 20 Ukuboza 2023, aho basuzumye uko bashyiraho inzego zihamye zizafasha mu kuyobora no gucunga aho bafite imbaraga za gisirikare na politiki, cyane cyane mu Burasirazuba bwa Congo.

Impinduka muri politiki ya Congo n’ukwishakamo ibisubizo

Iyi gahunda ya AFC ishyirwa mu bikorwa mu gihe ubuyobozi bwa Kinshasa bukomeje kwerekana intege nke mu gucunga ubukungu n’umutekano w’intara zigaruriwe n’imitwe yitwaje intwaro. AFC, ifatwa na bamwe nk’umutwe wa politiki ubumbatiye ibice bifite imbaraga za gisirikare n’ubushake bwo kwigenga, irasa n’ishaka kwerekana ko ishoboye kuyobora neza aho ibarizwa.

Kwemeza no gushyira mu bikorwa inzego nk’AREFA, bigaragaza ko AFC itangiye gushyira mu bikorwa uburyo bwo kwihangira imiyoborere mu buryo bwigenga, ibinyujije mu gushyiraho amategeko n’inzego z’ubuyobozi zivuga rikijyana.

Icyerekezo n’ingaruka by’iri tangazo

Iyi ntambwe AFC ifite isobanura byinshi mu rwego rwa politiki n’ubukungu:

1. Ubutumwa bwa politiki: Ni ukwerekana ko AFC ifite ubushobozi bwo gushyiraho inzego za Leta ikorera aho igenzura, bikaba bikomeje gukoma mu nkokora ubusugire bwa Leta ya Congo Kinshasa.
2. Ubukungu: Gushyiraho urwego nka AREFA bishobora kuba intangiriro yo gutangira gukusanya imisoro, gucunga umutungo w’ako karere no gutanga serivisi mu buryo bwigenga.
3. Imibanire mpuzamahanga: Ibi bishobora kongera igitutu kuri Leta ya Kinshasa ndetse n’imiryango mpuzamahanga, cyane cyane niba AFC ikomeje kwerekana ko ishobora kubaka inzego z’igihugu gito kiri hagati muri Congo.

Iri tangazo rya AFC ni ikimenyetso gikomeye cy’uko politiki yo mu Burasirazuba bwa Congo iri kugana mu cyerekezo cy’ubwigenge buhambaye. Nubwo bamwe babibona nk’ubushotoranyi ku butegetsi bwa Kinshasa, ku rundi ruhande ni ishusho y’impinduka zishobora gutuma ubukungu n’imiyoborere ibera abaturage b’ako karere bihuta kurusha uko byari byitezwe.