Joseph Kabila yagaragaye mu Bice bigenzurwa na AFC/M23: Intambwe ikomeye mu mpinduka za politiki ya RDC

Uwahoze ari Perezida wa Repubulika Iharanira Demokarasi ya Congo, Joseph Kabila Kabange, yagaragaye mu bice biri mu maboko y’Ihuriro rya AFC/M23 rirwanya ubutegetsi bwa Kinshasa, mu gihe hakomeje kubaho urujijo n’amakimbirane akomeye hagati y’ubutegetsi bwa Perezida Tshisekedi n’abatavuga rumwe na bwo.  

Aya makuru yatangajwe mu rukerera rwo kuri uyu wa Mbere, na bamwe mu bayobozi bakuru b’iri huriro, barimo Col Willy Ngoma, Umuvugizi wa M23 mu bya gisirikare, na Lawrence Kanyuka, usanzwe ari umuvugizi wa AFC mu bya politiki.  

Col Ngoma yagize ati: “ARC/AFC yishimiye gutangaza ko hakiriwe mu cyubahiro uwahoze ari Umukuru w’Igihugu akaba na Senateri uhoraho, indwanyi y’abaturage, Joseph Kabila Kabange.”  

Ibi bikurikiye icyemezo cya Sena ya RDC cyo ku wa Kane ushize, cyo kwambura Kabila ubudahangarwa yari afite nka Senateri uhoraho, ku busabe bw’Umugenzuzi Mukuru wa FARDC, aho ashinjwa ibyaha bikomeye birimo ubugambanyi no gukorana na M23/AFC.  

Mu cyumweru gishize, Kabila yari yahakanye amakuru yatangajwe na guverinoma ya Kinshasa ko yageze i Goma, avuga ko ibyo ari “ibinyoma bikabije.”  

Ariko muri iryo jambo rye, yagaragaje ko “mu minsi iri imbere” ashobora kuzahagera, anenga bikomeye icyemezo cyafashwe n’ubutegetsi bwo guhagarika ishyaka rye no kumushakisha, yemeza ko bigaragaza “iherezo rya Demokarasi muri RDC.”  

Kabila mu ijambo rye ryo kuwa Gatanu ushize yagize ati “Ubutegetsi bwacu bwafashe umwanzuro ushimangira ko nta Demokarasi ikirangwa mu Gihugu cyacu.”  

Kuva guverinoma ya Kinshasa yatangira ibiganiro na M23 mu bihe bishize, Kabila yavuze ko nta mpamvu yatuma abandi Banyekongo babuzwa kuganira n’iri huriro, kuko ari rimwe mu mashyaka n’imitwe igaragaza ibibazo by’abenegihugu.  

Kwiyunga kwa Kabila n’uruhande rwa AFC/M23 bibaye mu gihe abasesenguzi batandukanye babona ko bishobora kuba ikimenyetso gikomeye cy’ihinduka ry’imitwe ya politiki muri Congo, ndetse bikaba bishobora kwihutisha isenyuka ry’ubutegetsi buriho cyangwa se impinduka iteguwe n’impande nyinshi zifite ubushake bwo guhagarika umwiryane urambye.  

Iki gikorwa kije kongera umuriro mu bibazo bya politiki n’umutekano muri RDC, aho igice kinini cy’igihugu kigenda kigwa mu maboko ya M23/AFC, mu gihe ubuyobozi bwa Perezida Tshisekedi bukomeje gutakarizwa icyizere imbere mu gihugu no hanze.  

Kwifatanya kwa Kabila n’ihuriro AFC/M23 ni intangiriro y’intambara ya politiki nshya muri RDC.  

Benshi baribaza niba ari intangiriro y’ukwiyuburura kw’ishyaka rye, igitutu ku butegetsi bwa Tshisekedi, cyangwa intambwe iganisha ku biganiro binini byo kwishyira hamwe mu gihugu cyasenyutse mu nzego zitandukanye.