M23 yaburiye u Burundi bukomeje kuyirwanya no kwifatanya n’umutwe w’iterabwoba wa FDLR

Umuyobozi ushinzwe politiki muri M23, Bertrand Bisiimwa, yahaye ubutumwa bukakaye Ingabo z’u Burundi ziri mu Ntara ya Kivu y’Epfo mu Burasirazuba bwa Repubulika Iharanira Demokarasi ya Congo (RDC), azisaba gusubira mu gihugu cyazo, anaburira ko abantu barwanira uburenganzira bwabo “nta cyo baba bafite cyo gutakaza.”  

Ibi yabivugiye mu kiganiro n’abanyamakuru cyabereye i Goma ku Cyumweru, aho yanagarutse ku ishusho rusange y’ibice M23 imaze kugenzura nyuma yo kongera imbaraga mu rugamba rwo guharanira uburenganzira bw’abaturage bo mu Burasirazuba bwa Repubulika Iharanira Demokarasi ya Congo.  

M23 ikomeje kwagura ibice igenzura, harimo Umujyi wa Goma n’inkengero zawo muri Kivu y’Amajyaruguru, ndetse n’ahandi muri Kivu y’Epfo hafi y’Umujyi wa Bukavu.  

Ibi bikorwa bya M23 biragenda bihindura isura y’akarere, cyane cyane mu gihe Ingabo z’u Burundi zifatanyije n’iza leta ya RDC, FDLR na Wazalendo, zikomeje imirwano mu misozi ya Uvira, cyane cyane i Rugezi, muri Teritwari ya Fizi.  

Bisiimwa yavuze ko u Burundi butigeze bugirana ibiganiro na M23, ahubwo ko bushyigikiye ibikorwa byo kurwanya uyu mutwe bifatanyije n’imitwe y’inyeshyamba nka FDLR.  

Yagize ati: “Hari abarwanyi benshi ba FDLR bari hafi y’umupaka aho bari kwisuganya ngo badutere. Aho ni ho ibitero biri guturuka. Igisirikare cy’u Burundi cyinjira mu bice byacu, kikica abaturage b’abasivile. Si byo dushaka.”  

Bisiimwa yagaragaje ko M23 idafitanye ikibazo n’Abanyarwanda cyangwa Abarundi nk’abantu, ahubwo ko ikibazo gihari ari abayobozi bohereza ingabo zica abaturage.  

Yongeyeho ko n’ubutasi bwa leta ya RDC buri gukorera cyane mu bice bya Uvira bugaha amakuru ingabo zishinzwe kurasa hakoreshejwe drones mu duce dutuwe n’abaturage.  

Bisiimwa yagarutse ku mateka yo kurwanya akarengane muri aka karere, avuga ko Perezida Evariste Ndayishimiye ubwe yamwemereye ko intambara ya M23 isa n’iyo ishyaka rye CNDD-FDD ryanyuzemo. 

Ati: “Yambwiye ko intambara yabo yayobowe no guhangana n’akarengane. None se kuki uyu munsi ari gukora ibyo yigeze kurwanya? Museveni, Kagame, Ndayishimiye, bose bagiye ku butegetsi nyuma yo kurwanya ihezwa. None ubu bari ku ruhande rw’abakandamiza?”  

Bisiimwa yahamije ko M23 nta nyungu ifite mu Burundi, kandi ko iri ku butaka bw’igihugu cyayo. Yavuze ko amahirwe ari uko baganira na Leta ya Kinshasa, aho kohereza ingabo z’amahanga ari nko kongera ububabare ku baturage basanzwe bagowe n’intambara.  

Ati: “U Burundi bukwiriye kwita ku bibazo byabwo. Icyo tubusaba ni kimwe: kuva ku butaka bwacu.” 

Imirwano iherutse kuba mu misozi ya Uvira hagati ya M23 n’Ingabo za Leta zifatanyije n’Abarundi, FDLR na Wazalendo, irimo gufata intera nini. Bisiimwa avuga ko ari urugamba rwo kwihagararaho no guharanira ko uburenganzira bw’abaturage butongera guteshwa agaciro.  

Ati: “Iyo abantu bahejwe, ntacyo guhomba baba bafite. Barwana nta kwitangira kugira ngo babeho. Ni ibyo turi gukora.”  

Uyu muburo wa M23 utanzwe mu gihe Perezida w’u Burundi, Evariste Ndayishimiye, yari mu ruzinduko i Kinshasa, aho yahuye na mugenzi we wa RDC, Félix Tshisekedi. Birashoboka ko ibyavugiwe muri icyo kiganiro cy’abakuru b’ibihugu bizagira ingaruka ku myanzuro y’ahazaza h’iyo ntambara.